Kongresi
Kongresi është organi më i lartë i partisë, që numëron nga 650 deri më 700 delegatë. Mënyra e punës së Kongresit përcaktohet me rregulloren për punën e tij.
Kongresi i Partisë ka kompetencat vijuese:
- Miraton Statutin dhe ndryshimet e Statutit;
- Miraton programin dhe veprimet kryesore të Partisë;
- Përcakton vizionin për zhvillimin e Partisë;
- Miraton raportin e organeve dhe trupave të Partisë;
- Në përputhshmëri me rregulloren për punë të Kongresit zgjedh me votim të fshehtë anëtarët Kuvendit të Partisë;
- Në përputhshmëri me rregulloren për punë të Kongresit zgjedh me votim të fshehtë Kryetarin e Partisë;
- Me shumicë 2/3 bën shkarkimin e Kryetarit të Partisë;
- Me propozim të Kuvendit të Partisë bën emërimin e Kryetarit të nderit të Partisë;
- Me shumicë 2/3 sjell vendim për shpërbërje të Partisë ose bashkimin e saj me ndonjë parti tjetër;
- Themelon këshillin e nderit të Partisë;
- Miraton Kodeksin Etik të Partisë;
- Sjell rregulloren për punën e Kongresit;
- Përcakton emrin dhe vendos për ndryshim të emrit të Partisë;
- Përcakton emblemën dhe vendos për ndryshim të emblemës së Partisë,
- Përcakton himnin dhe vendos për ndryshimin e tij;
- Përcakton flamurin dhe vendos për ndryshimin e tij;
- Në përputhje me rregulloren për punë të Kongresit formon trupat punues të tij;
- Delegon kompetenca te trupat dhe organet e tjera të Partisë deri në mbledhjen e ardhshme të Kongresit;
- Sjell akte të tjera të përcaktuara me këtë Statut.
Kuvendi i Partisë
Kuvendi i Partisë ka kompetencat vijuese:
- Me propozim të Kryetarit të Partisë zgjedh dhe shkarkon anëtarët e Kryesisë së Partisë,
- Me propozim të Kryetarit të Partisë zgjedh kryetarin e Akademisë,
- Miraton Platformën e Partisë,
- Debaton për çështje aktuale politike, juridike dhe socio-ekonomike dhe merr qëndrim rreth tyre,
- Përkujdeset për realizimin e përcaktimeve programore të Partisë,
- Përcakton propozim-raport për punën e Partisë që do t’i dorëzohet Kongresit,
- Miraton planin financiar dhe llogarinë përfundimtare të Partisë,
- Me propozim të Kryetarit të Partisë emëron komisionin për çështje financiare të Partisë,
- Miraton listat e kandidatëve për deputet,
- Miraton kandidaturat për kryetar komune,
- Me propozim të Kryetarit të Partisë vendos për plotësimin e vendeve të zbrazura të Kuvendit të Partisë,
- Me propozim të Kryetarit të Partisë sjell vendime për lidhje të bashkëpunimit me parti simotra jashtë vendit,
- Sjell rregullore për funksionimin e vet,
- Themelon komisione dhe trupa të tjerë punues,
- Përcakton lartësinë e taksës së anëtarësisë, si dhe mënyrën e arkëtimit të saj,
- Merr iniciativë për formimin e Asamblesë së Gruas,
- Merr iniciativë për formimin e Forumit Rinor,
- Kryen obligime të tjera të përcaktuara me këtë statut ose me autorizim të veçantë të Kongresit të Partisë.
Kryesia e Partisë si organ politik-vendimmarrës është organi më i lartë ekzekutiv i Partisë dhe numëron nga 21 deri në 51 anëtarë.
Kryesia e Partisë ka kompetencat në vijim:
- Përkujdeset për implementim të vendimeve të marra nga Kuvendi i Partisë,
- Debaton në lidhje me Platformën e Partisë,
- Propozon ndryshime të Statutit të Partisë,
- Propozon ndryshim të Programit të Partisë,
- Kryesia e Partisë ia propozon Kuvendit të Partisë listën e kandidatëve të mundshëm për deputetë.
- Kryesia e Partisë ia propozon Kuvendit të Partisë kandidatët e mundshëm për kryetar komune.
- I ndërton dhe implementon qëndrimet politike të Partisë.
- Bën emërim të bartësve të funksioneve shtetërore.
- Mban llogari për respektim të dispozitave të Kodeksit etik të Partisë.
- Vendos për çështje të tjera në përputhje me këtë Statut.
- Kryen obligime të tjera të deleguara nga ana e Kuvendit të Partisë.
Akademia
Akademia është organ strategjik-këshillëdhënës i Partisë.
Aktivitet parësor i Akademisë është ndërtimi i politikave strategjike për veprim të Partisë në të gjitha nivelet. Ajo i përgatit të gjitha aktet normative, duke filluar prej Statutit, Platformës, Strategjisë afatshkurte, afatmesme, afatgjate etj.
Akademia ka për obligim t’i ndihmojë profesionalisht, në të gjitha aspektet, bartësit e funksioneve nga radhët e Aleancës për Shqiptarët.
Asambleja e Gruas e Aleancës për Shqiptarët është organizatë politike e vajzave dhe grave, anëtare dhe simpatizante të Aleancës për Shqiptarët. Organizimi, funksionimi, si dhe mënyra e zgjedhjes dhe shkarkimit të bartësve të funksioneve të Asamblesë së Gruas rregullohen me rregullore të veçantë, të bazuar në parimet themelore të Statutit.
Forumi Rinor i Aleancës për Shqiptarët është organizatë politike e të rinjëve, anëtarë dhe simpatizantë të Aleancës për Shqiptarët.
Organizimi, funksionimi, mënyra e zgjedhjes dhe shkarkimit të bartësve të funksioneve të Forumit Rinor rregullohen me rregullore të veçantë, të bazuar në parimet e Statutit.
Këshilli mbikëqyrës
Këshilli mbikëqyrës mbikëqyr punën administrative të Kryesisë së Partisë. Për punën administrative dhe punët financiare i jep raport Kuvendit të Partisë 1 herë në vit. Këshilli mbikëqyrës përbëhet nga 5 anëtarë, të cilët janë anëtarë të Kuvendit të Partisë, ndërsa nuk janë të përfaqësuar në Kryesinë e Partisë.
Komisioni statutar
Komisioni statutar ndjek zgjedhjet brendapartiake në të gjitha nivelet, intervenon nëse ka shkelje statutare dhe ka për detyrë t’i interpretojë dispozitat e Statutit. Komisioni statutar përbëhet nga kryetari i komisionit dhe 4 anëtarë.
